Gipasidaan si kanhi US Vice President, environmentalist ug Nobel peace laureate Al Gore sa Pilipinas sa mahimong masinati nga katalagman sa nasod kun magpadayon gihapon ang pagsaka sa temperatura sa kalibotan.
Matud ni Gore kun dili mapugngan ang pag-init sa planeta, 50 porsyento sa mga living species sa kalibotan, apil na ang mga endemic species sa Pilipinas ang mangawala sulod sa usa ka siglo.
Giingong mahurot na ang mga endangered species sama sa Philippine Eagle nga karon pa lamang, endangered na.
Gipasabot ni Gore nga ang pag-init sa planeta gipa-grabe sa padayon nga paggamit sa carbon dioxide nga nag-unang contributor sa greenhouse gases nga nagsap-ong sa grabeng init sa atong kalikupan.
Angay kini nga ikaalarma tungod kay naabot na ang sangpotanan ug mahimo pang maigo og balik og mas kusog nga bagyo ang Pilipinas nga sama o mas kusog pa sa Yolanda tungod sa padayon nga pag-init sa mga kadagatan.
Posible usab nga maapektuhan sa climate change ang mga tanom nga humay, mais ug kamote nga moresulta sa problema sa food security.
Giduyogan na usab kini sa nagkasaka nga sea level sa Pilipinas tungod sa thermal expansion ug pagkahilis sa mga ice sa Greenland ug Antartica.
Mao nga panawagan ni Gore, sundon unta sa mga miyembro nga nasod ang nasabotan sa Paris Climate Accord niadtong Disyembre 2015 diin apil didto ang Pilipinas nga misaad nga dili na patas-on pa sa kapin sa 2 degrees celsius ang global temperature.
Niadtong Sabado, sorpresang mibisita sa syudad sa Tacloban, Leyte si Gore aron kumustahon ang kahimtang sa syudad nga pinakagrabeng naigo sa bagyong Yolanda niadtong Nobembre 2013.
Si Gore ang tigpamulong sa gipahigayong training seminar kalabot sa climate change nga gipahigayon sa kaulohan niadtong Marso 14 hantud Marso 16.
