Gipangita karon sa kapulisan ang duha ka mga lalaking gituhuang suspetsado sa paglugos ug patay sa 14-anyos nga dalagita sa sitio Kanlisay, Barangay Caslaan sa lungsod sa Siaton.
Matud sa initial nga imbestigasyon sa kapulisan sa lungsod sa Siaton ang biktima gisugo lamang kini sa iyang inahan sa pagpahatag ug pasaw sa baboy didto sa balay sa iyang magulang diin adunay 100 metros ang distansya.
Ang inahan sa biktima natingala human nga nilabay ang pipila ka oras nga wala mauli ang iyang anak hinungdan nga iyang gi-apas ang biktima. Apan dakong pagka-kurat niya sa dihang nakit-an niya ang iyang anak nga nagbuy-od ug naligo sa iyang kaugalingong dugo.
Sa pakisusi sa kapulisan gituhuan nga gilugos una ang maong biktima sa duha ka mga suspetsadong lalaki. Wala pa gayud makontento ang mga suspetsado ug gikutlo ang kinabuhi sa maong biktima pinaagi sa paggolgol sa liog niini.
Ang kapulisan sa lungsod sa Siaton nihimo karon sa makuting imbestigasyon pag-ila ug paglanat sa mga suspetsado nga naghimo sa linoog nga krimen.
