Nisaka ang gidaghanon sa mga toristang langyaw nga nibisita sa dakbayan sa Dumaguete sumala sa talaan sa Tourism Office.
Kini nagpakita sa maayo nga direksiyon sa pagdumala sa dakbayan sa Dumaguete sa natad sa torismo.
Matud ni City Tourism Officer Woodrow Maquiling nga basi sa ilang talaan sa City Tourism Office niadtong tuig 2015 nisaka ngadto sa 489,814 ang gidaghanon sa mga nibisita nga mga langyaw. Kini nagpakita nga adunay growth rate nga 135.52% sukad niadtong 2011.
Kini ang hinungdan nga nalakip ang Dumaguete sa ikatulong dapit sa rehiyon-7 sa mga lugar nga sikat bisitahon sa mga torista.
Ang dakbayan sa Dumaguete basi sa Agoda.com apil ang Dumaguete sa mga listahan sa Top 10 Cities nga bisitahon sa mga torista sa tuig 2015. Ang mga batan-on nga mga torista ang kasagaran nga nibisita sa dakbayan diin nalupigan ang mga lugar sa Yuto og Nagoya sa nasud as Japan, Koh Lanta,Thailand og NHa Trang, Vietnam.
Dugang ni Maquiling nakab-ot ang kalambuan pinaagi sa maayong promotion sa buhatan sa City Tourism Office diin naila ta sa tibuok kalibutan isip 5th best place to retire.
Ang Dumaguete sa pagkakaron matud ni City Tourism Officer Maquiling nga naila sa tibuok Asya nga giduaw sa mga langyaw torista.
Dugang ni Maquiling nga andam na ang dakbayan sa Dumaguete sa pagdawat sa mga bisita, gani daghan na mga dugang hotel ang gipangtukod dinhi sa syudad.
