Han-ay na ang tanang kalihukan sa dakbayan sa Dumaguete alang sa pagsaulog sa tinuig nga kapistahan sa dakbayan.
Matud ni Mayor Sagarbarria gisigurado niya nga mahan-ay ang mga kalihukan diin ang Opening Salvo ipahigayon karong Nobembre 20, adlawng Biyernes. Ang opening salvo ipahigayon kini sa Quezon Park pinaagi sa Farm Family Congress.
Ang Farm Family Congress dumalahon kini sa City Agriculture office pinagi ni city agriculturist og City Administrator William Ablong.
Sumala ni Mayor Sagarbarria ang buhatan sa City Tourism Office maoy gitahasan sa mga kalihukan sa dakbayan diin sugdan sa Nobembre 20 og molungtad hangtud Nobembre 28.
Human sa kalihukan sa kapistahan mosunod gilayon ang mga kalihukan pagpangandam usab sa adlaw sa Pasko.
Dugang ni Sagarbarria karong November 23,ipahigayon ang Talent Night presentation sa Miss Dumaguete; Miyerkoles, November 24 mao ang Sandurot Festival unya ang coronation night adto sa Negros Oriental Convention Center.
Samtang sa laing bahin, si City Tourism Officer Woodrow Maquiling Jr. nagkanayon napulo ka mga kandidata ang magtige sa pagkuha sa korona alang sa Miss Dumaguete title.
Matud ni Maquiling ilang gipili ug maayo ang mga mahimong kandidata sa Miss Dumaguete aron subling makapadala ang dakbayan ug kandidata sa mga national ug international pageants sama ni kanhi Miss Dumaguete Lorraine Kendrickson nga naka-apil sa Miss World og napili nga Miss Princess.
Gani ang napili nga Miss Negros Oriental 2015, usa pod ka kanhi Miss Dumaguete nga gitakdang ipadala sa Binibining Pilipinas. (SGR)
