Ang mga miyembro ug pensiyonado, apil na sa mga surviving spouses niini subling gipahinumdoman sa Government Service Insurance System sa pag-file sa saktong GSIS benefits sulod sa panahon nga gilatid sa balaod.
Gitumbok sa GSIS nga ubos sa Akta Republika 8291 (GSIS Act of 1997), ang separation, unemployment, nonwork-related disability, funeral, ug survivorship benefits adunay 4 ka tuig nga prescriptive period.
Ang work-related employees’ compensation disability claims mahimong ma-file sulod lamang sa 3 ka tuig gikan sa date of contingency.
Sugod niadtong Mayo 2011, giluagan na sa GSIS ang prescriptive policy alang sa survivorship benefit sa dihang gisagop niini ang palisiya nga ang application for funeral benefit nga nahaunang gi-file ug gi-claim sulod sa 4 ka tuig, e-tratar isip “constructive notice” sa aplikasyon alang sa survivorship benefit.
Ang tanang klase sa GSIS claims ug benefits nga naglangkob sa separation, unemployment, disability, funeral, ug survivorship ginadawat ug gina-proseso sa bisan asang 57 ka GSIS branch ug extension offices sa tibuok nasod apil na sa ilang Head Office sa syudad sa Pasay.
Ang mga miyembro ug pensiyonado ug survivors nga adunay mga dugang pangutana kalabot sa prescriptive period, mahimong motawag sa lokal nga buhatan sa GSIS dinhi sa Bohol sa tel. no. 501-0579/ 235-5208 o sa ilang buhatan sa kaulohan sa 847-4747 ug mahimo usab mo- email sa gsiscares@gsis.gov.ph. (PIA)
