Pormal na nga gitunol sa IHOME Metro Dumaguete ang napulo ka mga balay ngadto sa mga gipili nga mga makadawat sa balay.
Ang Integrated Housing Organization for Mass Based Endeavor kon IHOME nga kanhi Habitat for Humanity,nihimo sa inauguration ug turn-over ceremony diin kini gisaksihan sa mga opisyales sa IHOME ug sa kadagkuan sa dakbayan sa Dumaguete.
Nitambong sa kasaulogan sila si Mayor Manuel Sagarbarria, Vice-Mayor Woodrow Maquiling, Engineer Greg Uymatiao kinsa maoy Chairman sa IHOME Dumaguete,pangulo sa working committee Leovigildo Elmaco ug Engr. Joe Quiambao. Kalakip usab nga nitambong ang mga napulo ka mga donors sa unang napulo ka mga balay, mga home partners og volunteers.
Si Mayor Manuel Sagarbarria nitunol sa iyang pasalamat ngadto sa IHOMe Metro Dumaguete sa gihimo niini nga pag-abag sa kagamhanan sa dakbayan nga masulbad ang suliran sa pabalay. Ang gibuhat nga programa sa IHOMe dako kaayo kini ug tabang sa mga nagpuyo dinhi sa Dumaguete nga walay kaugalingon nga balay.
Gipasalig sa Mayor ang iyang padayon nga pagsuporta sa IHOME Dumaguete diin siya usab donor kaniadto sa Habitat for Humanity nga mao na karon ang IHOME. Ang mga housing project sa Habitat nahimutang sa Barangay Bajumpandan, Balugo, Candau-ay og Cadawinonan.
Dugang ni Mayor Sagarbarria nga ang dakbayan sa Dumaguete padayon gayud kini nga nangita ug pamaagi nga adunay higayon nga maka-angkon ug kaugalingon nga balay ang mga lomolupyo sa Dumaguete.
Samtang gidayig og gipasalamatan usab ni Vice Mayor Woodrow Maquiling ang mga donor sa IHOME Metro Dumaguete sa kanunay nga pagtabang sa syudad sa pagtabang sa mga kabus nga makabaton og panimalay.
