Si 2nd District Cong. George Arnaiz maoy nangulo sa blessing ug inagurasyon sa duha ka classroom didto sa Lonoy National High School ug sa Lonoy Elementary School sa barangay Lonoy sa dakbayan sa Bais.
Ang DepEd Bais City Supt. Dr. Woodrow Dinoyo mainiton nga mipadangat sa iyang mensahe ug pagdasig sa mga kabataan. Mapasalamaton siya sa mga opisyales sa lokal nga kagamhanan nga nitabang nga madugangan ang mga classroom ug mapalambo ang mga tunghaan. Gidasig usab niini nga mapadayon sa pagpalambo sa organic agriculture diin kini kusganon nga giduso ni Congressman George Arnaiz.
Si Congressman Arnaiz mitunol usab sa iyang mga mainitong mensahe sa mga mitambong sa maong kalihukan, barangay opisyal, istudyanti, magtutudlo ug uban pa.
Si Congressman Arnaiz maoy nahimong taytayan sa pagpangayo sa mga pundo gikan sa nasudnong kagamhanan alang sa nagkadaiyang proyekto ug usa niini ang ahensiya sa DepEd aron mapatukuran ug mga lawak saringan ang mga nagkadaiyang tulunghaan.
Nitambong sa maong kalihukan mao sila si Bais City Mayor Mercy Teves Goni kauban sa konseho nga gipangulhan ni Vice Mayor Miguel Real, Dumaguete Mayor Manuel Sagarbarria,Vice Gov.Mark Macias, Dumaguete City Councilor Nilo Sayson, Board Members Rommel Erames, Mariant Escano-Villegas.
Samtang, nagmalampuson usab sa paghatod sa serbisyo medical sa barangay Sab-ahan sakop gihapon sa dakbayan sa Bais.
Ang serbisyo medical gidala ni Congresista Arnaiz ubos sa pag-abag sa lokal nga kagamhanan sa dakbayan sa Bais.
Ang mga lumolopyo sa maong lugara nakabinipisyo sa libre nga check up, libreng tuli, libre nga ibot sa ngipon ug libre nga paghatag sa tambal ug mga bitamina sa mga kabataan ug sa mga hingkod nga pangidaron. Libre usab nga pagtaod ug mga imported nga ariyos ang gihatod ni Kongresista Arnaiz ngadto sa mga kabataan ug mga dalagita nga wala tuhog ang dalonggan.
