Nikabat sa dose ka mga hugpong sa mga gagmay’ng negosyante sa Dumaguete City ang nakadawat ug pundo isip seed capital gikan sa Bottom Up Budgeting(BUB) sa kagamhanang local sa siyudad. Ang buhatan sa Sectoral Desk Office maoy gitahasan sa Mayor’s Office nga nag-atiman sa mga gagmay nga negosyanti kinsa naglaum nga mapalambo ang ilang panginabuhian.
Kini nga mga grupo naglakip sa Federation of Dumaguete Urvan Poor,Dumaguete Balot Vendors Association, Dumaguete Tempura and Balot Association, Settlers Association of Habitat-1-Bajumpandan, Federation of Dumaguete Association for Socio Economic Development, FAR Alley Vendors Association, Dumaguete Association of Vegetable Vendors Association,Dumaguete Recycler Association, Assorted Ambulant Vendors Association, Dumaguet Ambulant Fruit Vendors Association, Plant Grower Vendors Association, Juice & Banana cue Vendors Association ug Peanut Vendors Association.
Matud ni Mayor Manuel Sagarbarria bisan kon ginagmay ang ilang negosyo apan nakahatag kini og panginabuhian, lakip usab paghatag og trabaho sa ilang silingan.
Dugang ni Mayor Sagarbarria nga sulod sa iyang pagdumala sa dakbayan usa sa iyang gitutokan mao nga masiguro gayud nga dili mawad-an sa panginabuhian ang mga gagmay’ng negosyante.Kini ang rason nga iyang gitukod ang Sectoral Desk Office nga maoy mo-atiman sa mga gagmay negosyanti.
Ang Treasurer sa Balot Vendors Association nga si Jennifer Cuevas nipadayag sa iyang dakong kalipay nga nahatagan sila ug dugang pundo capital alang sa ilang negosyo. Nalipay siya sa suporta nga gihatag ni Mayor Sagarbarria sa mga gagmay’ng mga negosyante.
Tungod niini mas mapalambo pa gyud nila ang ilang negosyo bisan ginagmay apan kanunay.
