Panahon na usab aron mag-file og income tax returns.
Matag tuig, maggukod sa pagsang-at og ITR ang kadaghanan sa mga tigbayad og buhis, mao nga tag-as ang mga pila sa mga opisina sa Bureau of Internal Revenue (BIR) samtang nagkaduol ang deadline.
Sa dili pa ang gitakdang deadline sa pag-file sa ITR sa Abril 15, nagpahinomdom na ang BIR aron paspas ug epektibo ang pagbayad sa buhis.
Adunay duha ka paagi sa pag-file sa ITR online: pinaagi sa electronic filing ug payment system o pinaagi sa e-BIR form nga iduso online.
Sa e-BIR, kinahanglan lamang i-encode sa e-BIR system sa website nga www.bir.gov.ph ang mga detalye, ipa-print kini, usa moadto sa bangko aron mobayad.
Apan alang sa mga senior citizen nga dili suhito sa online form, mahimong mo-diretso sa revenue district office aron didto mo-file sa ilang ITR sa manwal nga paagi.
Pahinumdom sa BIR, sayo nga mag-online aron makaduso na sa forms. Mas dali na karon kun itandi sa mga milabay nga tuig nga manwal lang ang paagi sa pag-file sa ITR tungod kay dili na kinahanglang mo linya ug wala nay taas nga pila.
Gipalap-dan pa karon sa BIR ang ilang bandwidth aron dili na magka-aberya sama sa milabay nga tuig diin nagka-problema sa sistema tungod sa daghang mga nag-file sa ilang ITR.
Panawagan pa sa BIR, dili na magpaabot pa sa deadline usa mobayad aron dili maglisud sa pag-file online. (PIA NEWS)
