Nipasidaan ang pamunoan sa Philippine Coast Guard sa mga pasahero sa mga sakyanang pangdagat batok sa pagsakay sa mga colorum nga barko karong Semana Santa.
Matud pa ni PCG Commandant, Rear Admiral William Melad, peligroso alang sa mga pasahero ang mga colorum nga barko ilabi na nga dili kini rehistrado, kulang pa sa mga gikinahanglang dokumento ug wala mosunod sa safety standards sa Maritime Industry Authority.
Giingong pahimoslan sa pipila ka tag-iya ug operator sa mga barko ug uban pang sakyanang pangdagat ang gidaghanon sa mga pasahero sa nagkalain-laing pantalan sa mga lalawigan ilabi na sa mga tourist destination.
Matud pa nga kasagarang magpa-arkila ang mga tag-iyahan og gagmay nga bangka padung sa nagkalain-laing isla.
Ang uban pa niini, mo-pwesto sa mga pantalan aron makakuha og mga istranded nga pasahero.
Gitataw ni Melad nga walay mga insurance alang sa mga pasahero ang mga colorum nga barko ug walay bisan life vest man lang ug uban pang life saving devices.
Tungod niini, gibuksan sa PCG ang ilang 24 oras nga hotline numbers 0917-724-3682 ug 0918-803-8353 nga mahimong tawagan aron isumbong ang bisan unsang kalabotan, pangutana o i-report ang mga ilegal nga operasyon sa mga passenger ferry. (PIA)
