Pormal na nabugkos ang dakbayan sa Dumaguete ug Alameda City sa nasud sa America pinaagi seremonya niadtong adlaw’ng Lunes diha sa Bethel Guest House diin ang maong kalihukan gisaksihan usab sa Sister City sa Yeongdong-Gun, South Korea.
Atol sa programa gipalanog ni Mayor Manuel Sagarbarria nga dili lang gentle people ang dakbayan kon dili usab naila kini nga university town sama usab kini sa Alameda City. Kon kahibaluan nga ang Alameda City daghan usab ug mga unibersidad.
Matud ni Mayor Sagarbarria nga ang kasabutan nahipatik na kini sa kasaysayan tali sa Dumaguete ug Alameda City, kinsa bisita usab atol sa Charter Day Celebration sa dakbayan.
Si Mayor Trish Spencer sa Alameda City nipadayag sa iyang kalipay nga napirmahan na sa hingpit ang Memorandum of Agreement tali sa ilang siyudad ug Dumaguete City.Iyang nakita ang Dumaguete ug Alameda nga adunay daghang mga butang nga common gawas nga parehas nga nahimutang daplin sa dagat diin pareho usab kini nga magpadayon sa paglambo labi na sa natad sa edukasyon, kultura ug uban pa.
Dugang ni Mayor Spencer nga usa ka makasaysayon ang ilang pagbisita dinhi sa Dumaguete,diin ikaupat ang Dumaguete nga adunay sister city ang Alameda, sama nasud sa Swiden, Japan, ug syudad sa China.
Maya usab si Mayor Trish Spencer nga nakighibalag sa mga opisyalis sa dakbayan. Nakadayeg si Mayor Spencer sa pagdumala sa siyudad pinaagi sa pagpangulo ni Mayor Manuel Sagarbarria.
Samtang, sa panagbugkos sa Dumaguete ug Alameda City dako usab ang kalipay sa mga magpatigayon nga sakop sa Negros Oriental Chinese Chambers of Commerce Inc.(NOCCI) pinagulohan ni Edward Du, diin ilang nakita ang dakong kalamboan sa natad sa negosyo.
Ang delegasyon sa Alameda City nakigtagbo sa mga sakop sa local nga mga negosyante sa dakbayan sa Dumaguete.
