Nadakpan na sa kapulisan ang gituhuang suspetsado sa sunod-sunod nga tulis dinhi sa dakbayan sa Dumaguete.
Si Dumaguete P/Chief Supt. Jovito Atanacio nagkanayon nga ang suspetsado nga si Jomark Bibe, hingkod ang pangidaron taga Habitat-Balugo nadakpan niadtung adlaw’ng Miyerkules human kini gitudlo sa mga biktima. Nikabat sa 21 ka mga kaso sa tulis ang natala sa kapulisan dinhi sa dakbayan sa Dumaguete sukad sa bulan sa Agosto hangtud na sa Septembre ning tuiga.
Matud pa ni Supt. Atanacio nga ang hitsura sa maong suspetsado maoy gitudlo sa mga biktima nga maoy nitulis kanila,basi sa hulagway sa adunay 5’1” ang gitas-on sa suspetsado,murag turko ang hitsura ug nagsakay sa XRM nga motorsiklo kolor itom.
Ang suspetsado nga si Bibe hugtanon nga nanghimakak sa pamasangil sa mga biktima. Matud niya amgid lang niya ug hitsura ang hulagway sa suspetsado nga giingon maoy nag-tulis kanila.
Nagtuo usab ang kapolisan sa Dumaguete nga dili lang si Bibe ang naghold-up kon dili adunay pay mga suspetsado nga nangita ra kahigayonan nga makabiktima.
Samtang, gi-awhag ni Police Supt. Jovito Atanacio ang tanang mga biktima sa hold-up dinhi sa dakbayan sa pagpursiger sa kaso lakip usab ang kasigbit nga mga lungsod sa pag adto sa kapolisan sa Dumaguete aron ubay nga mga kaso ang masang-at sa maong suspetsado.
