Naugdaw ang tiyangge sa lungsod sa Dauin human kini gilamoy sa kalayo niadtung Biyernes sa kaadlawon Disyembre 3, 2015 diin gibana-bana nga mokabat sa onse milyones ang danyos.
Sumala sa polis report sa lungsod sa Dauin nga ang alarma sa sunog nadawat sa may 12:30 sa tungang gabii niadtong Biyernes. Dali nga ni-responde ang kabomberohan sa lungsod sa Dauin.
Ang mga kabomberohan sa lungsod sa Zamboanguita, Valencia,Bacong, Dumaguete City og ang mga sakop sa Chinese Fire volunteers ni-abag human nga daling gilamoy sa kalayo ang tibuok tiyangge.
Matud ni PNP Chief Police Sr. Inspector Edwin Tuble pag-respondi nila sa alarma ilang gisiguro ang seguridad nga walay ma-disgrasya nga kinabuhi kay basin ug naay mosulay ug salbar sa ilang kabtangan.
Ang mga kabomberohan ni-deklarar nga kontrolado na ang kalayo alas tres na sa kaadlawon.
Ang lokal nga kagamhanan sa lungsod sa Dauin naningkamot karon sa pagpahiluna ug pagtabang sa mga stall owners ug mga nanindahay kinsa dakong na-apektuhan ang panginabuhian tungod sa maong sunog. (SGR)
