Mga kawani sa gobyerno gilauman nga makadawat na sa umento sa suholan human nihatag ug mensahe ang Malacanang nga adunay dakong posibilidad nga madawat na ang umento sa suholan.
Kini taliwala sa pagkadiskaril ug wala paglusot sa kongreso sa balaodnon nga Salary Standardization Law o SSL 4 tungod kay naabtan na sa pagsarado sa session.
Matud ni Presidential Communications Operations Office (PCOO) Herminio Coloma Jr., gi-andam na sa Department of Budget and Management ang ilang rekomendasyon kang Presidente Benigno ‘Noynoy’ Aquino III alang sa pagpatuman sa unang tranche sa salary adjustment alang sa mga kawani sa gobyerno.
Gitumbok ni Coloma nga pagmatuod sa determinasyon sa Presidente sa maong balaod ang pag-apil na sa 2016 budget sa pondong kinahanglanon alang sa unang tuig sa pagpatuman sa SSL 4.
Mokabat sa P57.9 bilyon ang pondo gikan sa 2016 National Budget ang gigahin alang sa unang hugna sa SSL 4.
Gawas niini mogahin usab ang DBM og susamang proposed National Expenditure Program alang sa tuig 2017 alang usab sa ikaduhang hugna sa umento sa suholan.
Gipaabot nga magpagawas og Executive Order ang Presidente aron magamit ang maong pondo alang sa salary increase imbes nga ma-realign o mahimong savings na lamang sa gobyerno. (PIA NEWS)
